Este sábado día 21 de xullo a partires das 22:30h celébrase unha nova edición de Noites no Castelo, un festival organizado dende a Concellería de Cultura do Concello da Guarda e que está subvencionado pola Deputación de Pontevedra.

Nesta cuarta edición contarase coas actuacións dos recoñecidos grupos de música Ardentía e Milladoiro, enchendo de boa música galega este emblemático espazo da vila guardesa, o Castelo de Santa Cruz, declarado Ben de Interese Cultural(BIC).

Ardentía
A actuación do grupo Ardentía está prevista para as 22:30h, este grupo de música galega será o encargado de inaugurar esta cuarta edición de noites no Castelo. Ardentía é un grupo de música tradicional galega nacido en 1990 na cidade de Vigo que incorpora instrumentos que non adoitaban estar presentes nas formacións de música folk galega coma birimbau, clarinete ou requinta.

 

Milladoiro
Sobre as 23:30h da noite está prevista a actuación dun dos grupos máis importantes de Galicia, Milladoiro, cunha traxectoria de máis de 35 anos, subirán ao escenario de Noites no Castelo para rememorar as mellores cancións dos seus 20 traballos discográficos e as novidades de “Atlántico” o seu último disco editado este mesmo ano.

O Festival Noites no Castelo consolídase xa coma unha cita musical ineludible do calendario de verán do Concello da Guarda, pasando polo seu escenario grupos coma a Banda Crebinsky, o gaiteiro Xosé Manuel Budiño, a cantante Mercedes Peón, a gaiteira Susana Seivane ou o grupo folk A Roda.