Desde o interior da península emprégase a autovía Rías Baixas A-52 en dirección Vigo. Existen dúas alternativas para chegar ata A Guarda desde Vigo: a primeira é ir dirección a Tui empregando a autovía A-55 e despois desviarse cara A Guarda pola estrada PO-552 que discorre paralela ao río Miño. Á altura da localidade de Goián (Tomiño) pódese continuar pola PO-552 ou ben pola vía de alta capacidade CG-4.2. en dirección A Guarda. Outra opción é utilizar a autoestrada AG-57 ata Baiona e continuar pola PO-552 ata A Guarda bordeando a costa.

Para os viaxeiros procedentes de Portugal existe a posibilidade de cruzar en ferri desde Caminha. Por estrada é necesario cruzar o Miño pola Ponte Internacional que une Valença de Minho e Tui ou pola Ponte da Amizade entre Vila Nova de Cerveira e Goián (Tomiño) para enlazar coa Guarda pola PO-552 ou a vía de alta capacidade CG-4.2.

As principais cidades de España están conectadas coa estación de autobuses de Vigo.

Desde a cidade de Vigo a empresa Lugove realiza o servizo Vigo – A Guarda ben por costa (en dirección Oia e Baiona) ou ben por interior por Tui cunha maior frecuencia. Os horarios varían segundo sexa día laborable, sábado, domingo ou festivo. Hai que ter en conta a temporada de inverno ou verán (xullo e agosto).

Consultar horarios en vigor, tarifas e recorridos na web de LUGOVE ou no Tlf: 646 34 92 24 / 609 97 79 44

Pódese chegar en bicicleta ata A Guarda empregando o carril bici que discorre en paralelo á PO-552 entre Baiona e A Guarda e que permite gozar da paisaxe e as magníficas vistas do océano Atlántico.

Outra alternativa é percorrer a ribeira do Miño desde a Fortaleza de San Lorenzo de Goián (Tomiño) pola senda fluvial que enlaza coa PRG 112, Senda dos Pescadores do río Miño na localidade do Rosal.