ESPAZO NATURAL

O Esteiro do Miño é o espazo natural máis interesante da Guarda. A desembocadura forma un esteiro e está considerado como un dos humidais máis importantes da Península coa confluencia de dous ecosistemas, o fluvial e o marítimo.
Está recoñecido polos biólogos e expertos ornitólogos pola variedade e cantidade de aves que escollen o esteiro para invernar. Conta con varias figuras de protección:

  • Rede Natura 2000 (LIC)
  • Incluído na “Lista de zonas de húmidas de Europa e Norte de África de importancia internacional” desde 1965.
  • Zona de Especial Protección para as Aves (ZEPA)
  • Zona de Especial Protección dos Valores Naturais (ZEPVN).

Desde os observatorios de aves parte unha senda que percorre os últimos quilómetros da desembocadura. A senda conta con paneis informativos referidos á importancia do esteiro, a fauna, a vexetación e os aspectos ecolóxicos.

TURISMO ORNITOLÓXICO

Píllaras papudas

A Ruta ornitolóxica pretende facilitar a observación de aves desde os dous observatorios construídos con esta finalidade e mediante paneis que permiten identificar as aves máis abundantes. A Asociación Naturalista do Baixo Miño (ANABAM) xestiona a Estación Ornitolóxica e facilita os instrumentos (prismáticos, cadernos) e o asesoramento imprescindible por parte de monitores especializados a grupos de visitantes.

RUTA PRG160 DESEMBOCADURA DO MIÑO

Ruta PR-G160

A ruta sinalizada comeza a poucos metros da igrexa parroquial de Salcidos dirixíndose cara á ribeira do Miño onde se localizan os observatorios de aves e se concentran a maioría das cen especies de aves que habitan ou invernan no esteiro. Percorre a marxe dereita do río empregando antigas sendas ata a súa desembocadura na praia do Muíño e continúa pola costa atlántica percorrendo parte da Senda Litoral. Posúe unha gran riqueza natural pola diversidade de flora e fauna, de elementos etnográficos como os fornos cerámicos, as pesqueiras, as salinas da desembocadura ou os muíños de vento na costa. Distintos paneis interpretativos distribuídos ao longo da ruta permiten identificar e coñecer todos estes valores.

+ DESCARGA RUTA