O Muíño, A Lamiña, A Armona e O Codesal
Na privilexiada contorna natural que forma a desembocadura do río Miño localízanse estas catro praias ao longo dos últimos dous quilómetros da desembocadura e que forman unha perfecta unidade. Ademais de ofrecer unhas vistas inmellorables cara Portugal e a desembocadura do río, estes areais están delimitados por un piñeiral que convida ao descanso e ofrece sombra para os días calorosos de verán. Estas praias de gran valor natural e paisaxístico forman parte do percorrido da ruta PR-G 160 Desembocadura do Miño. As praias fluviais vense afectadas pola marea, polo que o grao de salinidade aumentará cando a marea suba río arriba. Tamén influirá na temperatura das augas, con carácter oceánica coa marea alta e fluvial con marea baixa.
