• En 2024: 1 e 2 de xuño
• Lugar: Casco histórico e porto
• Organiza: Parroquia e grupos veciñais.
• Destaca: O esforzo de semanas de traballo e unha longa noite tradúcese nunhas fermosas alfombras florais.

O fin de semana seguinte á celebración do Corpus Christi elabóranse as tradicionais alfombras florais despois dun mes de preparativos.

Na noite do sábado ao domingo os veciños organizados por rúas do centro histórico e porto elaboran as alfombras florais e de sal tinguido de cores. Os veciños e todos os interesados en participar traballan durante toda a noite e parte da madrugada. Durante a mañá do domingo pódense observar as elaboradas alfombras con deseños moi coloridos e detallistas antes da procesión do Santísimo.

• En 2024: 15 e 16 de xullo
• Lugar: Porto
• Organiza: Comisión de festas da Virxe do Carme
• Destaca: Festa de gran tradición polo que o Día da Virxe, o 16 de xullo, é festivo local.

Festa de gran arraigamento entre os mariñeiros como noutras localidades costeiras. A Guarda celebra a Festa da Virxe do Carme o 16 de xullo coa celebración da misa solemne e despois a tradicional ofrenda floral aos náufragos. Ademais dos actos relixiosos destaca na véspera da Virxe unha verbena moi popular e un concerto de rock que adoita organizarse o sábado anterior. Durante a tarde do 16 dispútase a regata de gameliñas (pequenas embarcacións a remo).

• En 2024: 23 de setembro.
• Lugar: Monte Santa Trega
• Organiza: Irmandade do Clamor.
• Destaca: Festivo local ao ser unha celebración de gran tradición.

A Virxe de Santa Trega é a patroa da Guarda e conta con gran tradición relixiosa na comarca. Durante a mañá celébranse as misas e tras a procesión na honra á Virxe celébranse as tradicionais poxas dos produtos ofrecidos á santa. Despois as familias comen ao aire libre no Monte.