A técnico de Turismo do Concello da Guarda, Rosalía Verde, asistiu o 21 de febreiro en Madrid a unha reunión convocada pola Secretaría de Estado de Turismo, co obxectivo de coordinar actuacións e propostas para a promoción dos destinos turísticos da Rede EDEN.

A reunión comezou coa intervención de Antonio Nieto, Subdirector General de Cooperación y Competitividad Turística da Secretaría de Estado de Turismo, e asistiron técnicos de turismo doutros destinos EDEN, persoal de TURESPAÑA e de SEGITTUR.

Nesta reunión abordáronse cuestións como a visibilidade dos destinos EDEN nas actuacións de promoción estatais e en mercados internacionais, elaboración dun plan de marketing, xestión de contidos nos portais turísticos de TURESPAÑA, etc.

Un dos temas claves da reunión foi a posibilidade de constituír a “Asociación Española de Destinos de Excelencia (EDEN)” que facilitará a coordinación coa Secretaría de Estado de Turismo e permitirá un contacto máis fluído coa Rede Europea de Destinos EDEN, e as posibles actuacións de promoción conxuntas.

Como cada ano, dende o Concello da Guarda organízanse diversas andainas coas que se busca ofrecer aos veciños e veciñas alternativas de lecer saudable e ao aire libre. A primeira destas andainas terá lugar o sábado 25 de marzo, cun percorrido de 17 quilómetros. A saída realizarase dende o Camiño dos Burros en San Xián (O Rosal) ata chegar á Guarda. Esta andaina é gratuíta e as inscricións poderán realizarse ata o 20 de marzo xa que se emprega un autocar para o traslado dos participantes ata o inicio da ruta.

Este ano volveuse a organizar esta actividade conxuntamente coa localidade portuguesa de Caminha e na que se ofertarán 6 andainas programadas dende a Concellería de Deporte e Patrimonio para este 2017.

Para as dúas andainas organizadas antes do descanso de verán o prazo de inscrición pechará o 19 de abril. A segunda andaina será o sábado día 6 de maio. Trátase dunha ruta entre Allariz e Augas Santas, cunha distancia total de 15 quilómetros; e a terceira realizarase o sábado 3 de xuño, nunha ruta de tamén 15 quilómetros, pola Illa de Arousa.

En agosto, o luns 28, está programada unha andaina á Romaría de Arga de San Joao en Caminha, na que se poderán inscribir ata o 21 do mesmo mes.

A seguinte será en setembro, o sábado día 16, e proponse unha ruta de 22 quilómetros polas Fortalezas do Baixo Miño. A última terá lugar o sábado 7 de outubro, cunha ruta polas Lagoas de Bertiandos e S. Pedro (Ponte de Lima). O prazo de inscrición para estas dúas andainas estará aberto ata o 30 de agosto.

Todos os interesados en realizar as inscricións, consultar calquera dúbida ou obter máis información poden poñerse en contacto coa Oficina de Turismo da Guarda de maneira presencial de 9 a 14 horas de luns a venres, no teléfono 986 61 45 46 ou a través do correo electrónico turismo@aguarda.es.

.

O servizo do ferry que une A Guarda e a localidade portuguesa de Caminha verá interrompida temporalmente a súa actividade, por mor dos traballos de revisión obrigatorios, o 2 de marzo a partir das 13’30 horas.

Este xoves 2 de marzo, pola tarde, o ferry será levado ao astelario para realizar as correspondentes tarefas de revisión obrigatorias co fin de renovar os certificados de navegabilidade necesarios para continuar a súa actividade.

As travesías quedarán, por tanto, suspendidas ata novo aviso. En canto se teña coñecemento, informarase do día e hora no que o ferry retome o seu servizo.

Arruaz, Brisamar, Camping Santa Tecla, La Pizzicata, Novo Funil, Xantar e Xeito son os sete restaurantes da Guarda que neste Entroido propoñen desfrutar dun dos pratos por excelencia da gastronomía galega: o lacón con grelos.

O Menú do Entroido repite na Guarda trala boa acollida do pasado ano e organízase novamente ampliando datas. Dende o venres 24 ata o martes 28 de febreiro, tanto para o xantar como para a cea, poderemos degustar o Menú de Entroido nos restaurantes adheridos.

Os sete restaurantes participantes ofrecerán este menú por un prezo de 15 € por persoa, que estará composto por un primeiro prato de caldo, un segundo de lacón con grelos e unha sobremesa tamén típica nestas festas: filloas ou orellas de Entroido. Incluídos viño e café.

Os veciños, veciñas e visitantes, coñecedores da relevancia da cociña tradicional no noso pobo e da súa calidade, teñen nestas datas a posibilidade de saborear este prato típico a prezos populares que pode ser a escusa perfecta para organizar esa comida ou cea de Entroido cos nosos familiares e amigos.

Recoméndase a reserva previa cos propios restaurantes para que o servizo ofrecido sexa o mellor posible.

Dende o vindeiro venres día 24 e ata o martes 28 de febreiro, A Guarda entrégase á febre do Entroido cunha ampla programación. O prato forte desta celebración será o Desfile-Concurso de Entroido, que terá lugar na tarde do martes 28 de febreiro.

A saída deste Desfile farase dende a Praza de San Bernardo (“Esquina Famosa”), ás 17’30 horas e o percorrido atravesará a rúa Galicia e a avenida Rosalía de Castro, para rematar finalmente na Alameda. Os participantes deben presentarse entre as 16.30h. e as 17,15h. para colocarse nos seus postos, determinados pola Concellería de Cultura.

O obxectivo deste evento é manter a tradición local desta festa tradicional a través da participación de tódolos veciños da Guarda. Para isto, e tal e como recollen as bases do concurso, inclúense cinco modalidades diferentes de participación, e unha ampla variedade de premios.

Os interesados en participar en calquera das cinco modalidades (carrozas, comparsas, grupos, individual e parellas infantil, individual e parellas xuvenil-adulto) deberán entregar cuberto o formulario anexo ás bases e a documentación necesaria, ata o 22 de febreiro de 2017, en horario de 9 a 14h. de luns a venres, no Rexistro Xeral do Concello. Poderán remitirse inscricións por vía postal, selladas na oficina de Correos sobre o propio impreso de solicitude e acompañadas da documentación requerida, adiantando por fax a copia da solicitude sellada na oficina de Correos.

En canto aos premios, as categorías de comparsas e carrozas terán un primeiro e segundo premio cada unha, de 250€ e 150€ respectivamente. No resto de categorías haberá seis premios cunha contía que vai dende os 150 aos 30€. Ademais as 10 primeiras comparsas ou carrozas que se inscriban recibiran unha axuda de 200 euros e os nenos e nenas que participen terán un agasallo.

Dende a Concellería de Cultura invítase a tódolos veciños e veciñas a desfrutar de todo o Entroido, e en especial a participar (dentro ou fóra de concurso) no desfile do martes 28, para compartir unha divertida celebración chea de disfraces, música e moita troula.

O vindeiro 24 de febreiro cúmprense 180 anos dende o nacemento da escritora máis recoñecida e ilustre da literatura galega: Rosalía de Castro. Con motivo deste aniversario tan especial, dende a Concellería de Cultura da Guarda celebrarán a data coa “Semana por Rosalía”, cinco días de actividades adicados a ensalzar e coñecer máis unha figura clave da cultura galega.

Unha das actividades programadas é “Rosalía na Escola” e desenvolverase do luns ao mércores, entre os días 20 e 22 de febreiro. Durante eses tres días Maruxo ofrecerá un recital de poemas nos centros de primaria da vila.

Tamén os días 20 e 21 de febreiro os alumnos e alumnas dos centros de secundaria da Guarda realizarán un “Mural por Rosalía”, cun deseño para render homenaxe á autora.

Ademais, ese xoves 23 de febreiro o concello da Guarda organiza o “Festival por Rosalía”, no Centro cultural ás 20’30 horas. Nesta celebración da vida e obra da ilustre escritora haberá un recital de poemas de Rosalía a cargo de Maruxo e de rapaces da vila, ademais das actuacións de Coro Fuscalheiro, Son’Godins e o grupo de baile Xamaraina.

Para rematar esta semana adicada a Rosalía de Castro, o sábado 25 de febreiro terá lugar unha nova sesión de Contos Contados, ás 11’30 horas na Biblioteca Municipal, na que os máis cativos da vila tamén aprenderán a importancia dunha poetisa que marcou un antes e un despois na cultura e na literatura galega e española.

Unha fin de semana máis, A Guarda ofrece diversas posibilidades de ocio aos seus veciños, veciñas e aos visitantes que se achegan á localidade.

A primeira cita desta fin de semana será cunha nova barferencia da programación do Inverno 2016/17 que está a ter lugar estes meses na vila. Nesta ocasión a ponencia terá como tema “A Cidade dos nenos” e correrá a cargo de Mónica Martínez Baleirón. Esta profesora e tradutora falará na Cervecería The Celtic Harp, a partir das 20’30 horas, acerca do libro do pedagogo Francesco Tonucci que ela traduciu ao galego. Exporá, por tanto, un modelo e xeito de entender a cidade creado polo italiano e que xa se está a levar a moitas urbes europeas, como Pontevedra. Ten como base a idea de que unha cidade á medida da infancia redunda nunha mellor calidade de vida para todos.

O sábado 18 de febreiro a compañía A Tropa Trapalleira estreará, ás 17’30 horas no Centro Cultural, o espectáculo familiar “Pequena trapallada e algunha que outra batalla”. Tal e como eles o definen, este será un espectáculo para nenos e nenas de 6 a 99 anos que fará reflexionar ao público asistente sobre o absurdo da guerra e as súas consecuencias. A través do traballo corporal dos actores e apoiándose na música e na videocreación, constrúen un universo de diversión no que se poñen en valor cousas tan importantes como a amizade, o respecto, o compañeirismo e o humor. Trátase dun catálogo de trapalladas bélicas que, a través do humor, pretende invocar a tolerancia e a solución pacífica dos conflitos como bálsamo necesario nestes inquedantes tempos armados.

Os tickets para esta función son balde e poden recollerse durante toda a semana, ata agotarse, no Centro Cultural en horario de 10 a 13 e de 17 a 20 horas de luns a venres, e o propio sábado durante a mañá de 10 a 13 horas.

Achégase unha desas épocas destacadas para a vila da Guarda, na que as rúas énchense de cores, música, bailes e, en definitiva, de moita festa. O entroido xa case está aquí e para celebralo, dende a Concellería de Cultura do Concello da Guarda teñen preparado un completo programa para desfrutar deses días.

A troula comeza o venres 24 de febreiro co “Entroido dos coles”. A partir das 12 horas os nenos e nenas dos centros escolares da vila desfilarán cos seus disfraces. Sairán dende a Alameda e percorrerán a rúa Galicia ata rematar na Esquina do Gallo.

O día seguinte, 25 de febreiro, celébrase o “Sábado da mocidade”. A primeira cita do día será ás 17,30 horas, no Centro Cultural, coa proxección do filme Vicky El Vikingo. Anímase a que tódolos nenos e nenas acudan a esta tarde de cinema infantil cos seus disfraces. Xa pola noite a Carpa da Alameda acollerá, ás 23,30 horas, o concerto do grupo pontevedrés Gold and Colt que interpretarán música country-soul. Tras o concerto, á 1 da madrugada, dará comezo unha das novidades deste ano: o Concurso Drag Queen Guardés. Este busca fomentar de novo unha tradición moi arraigada na vila como é a de ver cada ano aos homes guardeses disfrazados de muller. As inscricións poden realizarse do 15 ao 23 de febreiro no Departamento de Cultura do Concello, en horario de 9 a 14 horas, no e-mail cultura@aguarda.es ou o mesmo día do concurso ata unha hora antes da súa celebración. Despois do concurso seguirá a noite coa Festa Retro que contará coa actuación de DJ CELIG.

O domingo 26 de febreiro terá lugar o “Día das familias” no que a partir das 18 horas haberá festa coa orquestra Carambola na Carpa da Alameda.

O luns de Entroido, día 27 de febreiro, haberá un Obradoiro de Máscaras e Pintacaras na Biblioteca Municipal ás 11,30 horas. Pola tarde, ás 18 horas na Carpa da Alameda, terá lugar o concerto do Trío Refugallo, un grupo de música tradicional infantil. E a partir das 19,30 horas continuará a festa coa Orquestra Estelares.

O entroido guardés vivirá o seu último e máis importante día o martes día 28, co Desfile de Entroido. Neste desfile-concurso os participantes percorrerán as rúas guardesas coas súas carrozas e comparsas. O prazo para anotarse nas diferentes categorías (carrozas, comparsas, grupos, individual e parellas infantil, individual e parellas xuvenil-adulto) estará aberto ata o 22 de febreiro. A saída do desfile será ás 17,30 horas da Esquina Famosa. Despois haberá festa coa Charanga Os Charamujas, que xa irán acompañando o propio desfile.

Dende o concello da Guarda convídase a tódolos veciños e veciñas a participar no Desfile e a desfrutar das diversas actividades e actuacións incluídas nunha programación coa que se espera que toda a vila celebre e desfrute do entroido.

La Guía de Empresas de la App del Ayuntamiento se está completando y ya son más de 300 las altas realizadas hasta el momento. En los últimos meses, más de 220 empresas fueron registradas en esta plataforma.

La finalidad con la que se crea esta guía en formato digital es la de contar con un registro actualizado de las empresas de la localidad de A Guarda. Tienen acceso a ella todas aquellas personas que lo deseen a través de la Aplicación para móviles App Concello da Guarda, una aplicación de descarga gratuita con gran variedad de contenidos, que busca ser un canal informativo de referencia en el municipio.

¿Cómo darse de alta?

El alta de las empresas es gratuita y puede realizarse de cualquiera de las siguiente maneras:

Presencialmente: en la Oficina de Turismo del Ayuntamiento (planta baja), de 8:00 a 15:00 de lunes a viernes.

Telefónicamente: en el 986 61 45 46, de 8:00 a 15:00 de lunes a viernes.

Por correo electrónico: en la dirección turismo@aguarda.es

¿Cuál será la información solicitada?

El nombre comercial de la empresa, la dirección, el teléfono/s de contacto, el horario de atención al público, el correo electrónico (e-mail) y el nombre de la página web o perfil en redes sociales (en caso de contar con los mismos).

Si tienes alguna duda al respecto, ¡ponte en contacto con nosotros!

De una forma muy sencilla podremos crear una Guía de Empresas completa, actualizada y de utilidad para vecinos/as y visitantes.

A Guarda estivo presente promocionando o seu turismo e a súa gastronomía na 18ª edición de Xantar, que acolleu o recinto Expourense, dende o 1 ao 5 de febreiro. Durante os cinco días nos que se celebrou o Salón Internacional de Turismo Gastronómico, que este ano recibiu a máis de 24.000 persoas, os visitantes achegábanse ao stand do Concello da Guarda con diversas consultas. Entre os temas de interese, a consulta máis común foi a data de celebración da Festa da Langosta e da Cociña Mariñeira, que este ano se celebra o primeiro fin de semana de xullo, os días 1 e 2; sendo o pregón o venres 30 de xuño.

No transcurso desta Feira, no stand do Concello da Guarda, ofreceuse unha degustación da Rosca de Xema, que tivo unha excelente acollida. Moitos xa coñecían este postre de anteriores visitas á Guarda, e aqueles que non o coñecían alabaron a súa dozura e mostraban interese en saber máis da súa elaboración. Ademais recoñecían que era un motivo máis para visitar proximamente A Guarda.

No marco das numerosas actividades organizadas en Xantar destacou o concurso de carteis de festas gastronómicas, no cal participaron carteis de Galicia e Portugal. O Concello da Guarda remitiu a este concurso o cartel da Festa da Langosta e da Cociña Mariñeira de 2016, que resultou gañador do segundo premio.

Deste xeito o domingo rematou unha feira de gran importancia, dado que é o único salón especializado en turismo gastronómico en España, que conta coa catalogación de Salón Internacional, e que ten como obxectivo impulsar o turismo de proximidade en Galicia. Nesta edición de Xantar o Concello da Guarda puido mostrar aos miles de visitantes, principalmente de toda a provincia de Ourense, así como do norte de Portugal, de León e da provincia de Lugo a súa riqueza paisaxística, cultural, gastronómica e turística, que fan da vila un dos principais destinos turísticos galegos.

Unha semana máis o Centro Cultural da Guarda acolleu un destacado evento cultural. A pesar do mal tempo da pasada fin de semana, numerosas persoas achegáronse o venres día 3 de febreiro á presentación da publicación “Camiños da Imaxe”.

Ante veciños e veciñas, representantes do goberno local e os deputados provinciais Montse Magallanes, Xosé Leal e Javier Dios, presentouse un libro que fala da obra do fotógrafo guardés Joaquín García Portela, máis coñecido como “Costiña”. Trátase dunha obra que xa foi exposta ao público na exposición do mesmo nome que estivo na Casa dos Alonsos o pasado verán, con gran éxito de asistencia.

O acto foi inaugurado polo alcalde da Guarda, Antonio Lomba, que agradeceu a tódolos asistentes a súa presenza e tivo un especial recoñecemento para a concelleira e a técnico de cultura pola paixón e esforzo postos neste proxecto. Ademais destacou que, fronte ás persoas que pensan que na Guarda non pasa nada, existen outras que crean e xeran espectáculo, como o homenaxeado Costiña. Tamén salientou a labor de Proxecto Socheo, responsables da exposición e da publicación, e por suposto, puxo en valor a figura de Costiña e da súa obra, entre a que se atopan uns filmes que levan aos guardeses e guardesas á súa infancia e á historia máis íntima da vila.

A seguinte intervención foi a de Ricardo Silva, portavoz da familia de Costiña, que agradeceu aos veciños, amigos, familia e autoridades pola súa presenza, así como as palabras do alcalde e o traballo de Proxecto Socheo. Expresou a satisfacción plena como familia por esta homenaxe, moito máis do que puidera soñar un fotógrafo como foi Costiña, un artesán da fotografía vencellado ás xentes máis humildes.

Pola súa banda o deputado de Cultura da Deputación de Pontevedra, Xosé Leal, expresou a súa alegría por acudir á Guarda a un acto como este. Presentouse, afirmou, unha publicación que amosa un gran cariño polo eido e o patrimonial audiovisual da vila, de gran importancia para recordar o pasado e para que o podan desfrutar tódalas xeracións. Destacou a Costiña como unha persoa que apostou polo cinema, algo difícil hoxe, canto máis na súa época.

A continuación Xurxo González Rodríguez e Beli Martínez, de Proxecto Socheo, realizaron unha detallada presentación do libro. Primeiro agradeceron o apoio do Departamento de Cultura do concello da Guarda e da Deputación de Pontevedra, que permitiu a materialización da publicación. Así como dos familiares de Costiña, en especial as súas netas, por facer posible o acceso ó arquivo do fotógrafo.

Todo isto permitiu realizar unha publicación que, afirmaron, conta con textos de grandes expertos do cinema, tanto locais como estatais, que acompañan á obra do fotógrafo. Tamén falaron dos capítulos da publicación, que inclúe diferentes temas como a propia figura de Costiña, A Guarda na época, a fotografía neses anos, etc. A Guarda, afirmaron, é terra de nacemento e paso de grandes fotógrafos.

Ademais, compartiron un vídeo-ensaio sobre os filmes de Costiña, uns filmes familiares realizados entre 1926 e 1929, que supoñen as primeiras películas filmadas na Guarda e por un guardés. Neste vídeo expuxeron datos sobre a vida do autor, as súas técnicas de filmación, a montaxe, os planos e secuencias, os movementos de cámaras, a experimentación coas luces e imaxes que marcaron a obra de Costiña, e os diversos valores do seu traballo, dos cales o principal é o seu valor documental.

Para concluír a velada, os presentes puideron desfrutar do visionado do filme de Costiña, acompañados dunha interpretación musical en directo do pianista Karolis Biveinis. Este foi un momento moi emotivo, no que se puido ver como os presentes se divertían antes as ocorrencias das fillas do fotógrafo, grandes protagonistas do filme. Tamén se viron imaxes de temporais da época na costa e dos mariñeiros, así como diversos paisaxes e lugares da vila, que o público recoñecía a pesar do paso dos anos. Deste xeito rematou unha noite moi especial de homenaxe a unha das figuras máis destacadas da historia e da cultura da Guarda.