A Guarda acolle esta semana a inauguración de dúas exposicións: “Exfimiño 2016” e “Escenarios da Prehistoria”

O Concello da Guarda acollerá esta semana a inauguración de dúas destacadas exposicións: a de “Exfimiño 2016” e a da mostra “Escenarios da Prehistoria”.

O mércores 12 de outubro, ás 18:00 horas inaugurase a Exposición Filatélica “Exfimiño 2016” na Casa dos Alonsos. Esta mostra, organizada pola Sociedade Filatélica e Numismática xa pode visitarse na planta baixa da Casa dos Alonsos ata o 16 de outubro con entrada libre. O horario pola mañá é de 11 a 14 horas, e pola tarde de 17 a 20h.

Trátase da XX edición da mostra EXFIMIÑO adicada ao coleccionismo na que se poderán ver as tradicionais mostras de filatelia. Como nas anteriores edicións, adícase o evento a un personaxe local destacado. Neste ano será Alfonso Martínez Peniza, primeiro vicepresidente da Sociedade Filatélica e Numismática Guardesa.

Por outro banda, o vindeiro venres 14 de outubro terá lugar a inauguración da exposición fotográfica “Escenarios da Prehistoria” no Centro Cultural da Guarda, ás 20.30 horas. Chega así ó concello da Guarda, tras estar en Marín, Mos e Cuntis, unha mostra organizada polo Servizo de Cultura e Lingua da Deputación de Pontevedra e enmarcada dentro da programación cultural do Ano Castelao.

Esta iniciativa xorde coa idea de percorrer as mámoas, castros e petróglifos máis singulares da provincia a través das fotografías de Federico de la Peña. Ademais, tamén busca reflexar a preocupación que Castelao sempre mostrou polo noso patrimonio arqueolóxico e artístico. A mostra estará aberta ó público dende o venres 14 ata o luns 31 de outubro no Centro Cultural da Guarda. O horario, de luns a venres, será das 10 ás 13 horas pola mañá e de 17 a 20 horas pola tarde; os sábados só en horario de mañá das 10 ás 13 horas.

Comentarios

Leave a Reply